HOFA: un decision pa autonomia berdadero (Parti 3) — HOFA Aruba y sindicatonan

Den e prome parti tocante Rijkswet HOFA pa Aruba mi a elabora riba e dilema central: autonomia contra supervision financiero. Mi a pone riba mesa e problema structural di Aruba: partitocracia, institutonan debilita y un cultura di control politico cu ta limita autonomia di berdad. Den Parti 2 mi a propone cu HOFA por bira un instrumento, pero solamente si Aruba ta scoge esaki conscientemente, cu condicionnan claro y cu meta di fortalece nos propio institutonan.

Den e parti final aki mi kier expande riba un pregunta importante cu ta biba den sociedad: segun sindicatonan, ken ta tuma pueblo haci? HOFA, Hulanda of wega politico?

Frustracion den pueblo cu HOFA pa Aruba

Nos ta wak un patronchi di frustracion den sociedad cu ta sali na diferente momento. E frustracion aki no ta nobo.

Nos a mira esaki den casonan di abuso den pasado, den debate riba husticia, y ultimo den caso Caret. Den cada uno di e momentonan aki, pueblo ta sinti impotencia. Hende individual ta sinti cu nan bos no ta yega.

HOFA Aruba vs. Sindicatonan

Como resultado, pueblo ta depende hopi biaha riba gruponan organisa, manera sindicatonan, pa vocifera loke un persona individual no por haci.

Esaki ta un señal importante. No ta un debilidad di sindicatonan, sino un indicacion cu e sistema di representacion directo di pueblo ta debilita.

Ora institutonan no ta suficiente independiente, ora parlamento no ta cumpli cu su rol di control, y ora un ciudadano no ta sinti cu e por influensia decisionnan, e espacio aki ta wordo yena pa sindicatonan.

Protestanan di sindicato

Den e caso di HOFA pa Aruba, nos a mira Sindicatonan protesta na varios ocasion, incluso riba e dia di bishita di Rey Willem Alexander. Pa algun hende, esaki por parce un reaccion emocional. Pero ora nos mira mas profundo, e mensahe di sindicatonan ta mas nuancea.

Den nan comunicacionnan, nan a enfatisa un paro na participa den e dialogo social, pasobra tin necesidad di transparencia y representacion husto, preocupacion riba integridad di proceso decisivo, y peticion pa un acuerdo claro prome cu por sigui.

Esaki ta mustra cu sindicatonan no ta rechazando gobernanza. Nan ta pidiendo un proceso equilibra y creibel.

No ta un “no” absoluto. Ta mas bien un: “si, pero cu condicionnan serio”.

Sindicatonan tin sano huicio

Esaki ta importante pa reconoce. Oposicion contra HOFA no ta necesariamente irracional. Den e caso aki, e ta nace for di un sentimento patriotico. Sindicatonan ta mira riesgo di perdida di soberania. Nan tin miedo di control permanente y nan ta pidi garantia. Den poco palabra Sindicatonan ta pidi confianza.

Y aki nos por mira algo interesante: e posicion di sindicatonan y e propuesta den Parti 2 ta mas cerca cu nan ta parce.

Sindicato y un HOFA condicional

Den Parti 2 mi a propone cu HOFA solamente por wordo acepta si e ta temporal, si e ta fortalece institutonan local, si e tin criterio midibel, si e supervision ta reduci progresivamente, y si e termina automaticamente ora Aruba cumpli.

Esaki ta responde precisamente na e preocupacion principal di sindicatonan: evita control permanente y proteha autonomia.

Asina, e rol di sindicatonan por wordo mira no como oposicion, sino como garantia di democracia. Nan ta recorda gobierno cu e condicionnan mester ta concreto.

Sindicatonan ta pone presion pa bin cu transparencia. Nan ta exigi claridad y ta insisti riba representacion.

Sindicatonan como wardadonan di HOFA na Aruba

Den un sistema unda partitocracia ta fuerte, e rol aki ta crucial. Pasobra ora un partido politico controla hopi institutonan, ta dificil pa nan control interno funciona.

Sindicatonan, manera actornan independiente, por crea e contrapeso necesario. No pa paralisa decision, pero pa evita cu decisionnan wordo tuma sin garantia pa pueblo.

E preocupacion di sindicatonan

E preocupacion di sindicatonan riba trato igual, confianza, transparencia y claridad prome cu participacion por sigui, ta conecta directamente cu mi argumento central: institutonan mester wordo fortaleci y haci transparente.

Esaki ta mustra cu mi posicion no ta contra sindicatonan. Al contrario, mi ta propone e condicionnan unda HOFA na Aruba hunto cu Sindicatonan, por bira aceptabel.

Mi no ta pro HOFA si e no ta sirbi Aruba. Mi ta pro HOFA solamente si e ta un instrumento pa construi autonomia real. Si e ta reduci influencia di partitocracia, si e ta fortalece independencia institucional, y si e ta aumenta transparencia.

Sin e condicionnan aki, HOFA por bira exactamente loke sindicatonan ta teme: un mecanismo di control permanente.

Pero cu e condicionnan aki, HOFA por bira un periodo di fortalecimiento temporal, scogi pa Aruba mes.

Enemigo berdadero di autonomia

Pasobra: disciplina financiero no ta enemigo di autonomia. Falta di disciplina ta enemigo di autonomia. Si Aruba por mustra cu nos ta capacita pa maneha nos finanzas, cu institucionnan independiente ta funcionando, y cu transparencia ta regla, e necesidad di supervision externo ta baha naturalmente.

Esaki ta autonomia di berdad.

Den e sentido aki, sindicatonan por tuma un rol constructivo. No solamente pa protesta of critica, pero pa participa den formulacion di criterio y vigila e implementacion.

No solamente pa expresa miedo, pero pa contribui na construi confianza.

HOFA si of no?

E pregunta final e ora, no ta: HOFA si of no. E pregunta ta: bou di ki condicionnan HOFA por fortalece Aruba?

Si gobierno ta dispuesto pa traha cu sindicatonan, cu expertonan y cu sociedad civil pa defini e condicionnan aki, HOFA por bira un paso consciente pa autonomia. Si no, e temor di sindicatonan ta legitimo.

Asina, oposicion no ta un obstaculo, sino un señal. Un señal cu pueblo ta pidi garantia. Un señal cu confianza no ta automatico. Un señal cu autonomia mester wordo construi, no declara.

E decision final ta den nos man. No di Hulanda. No di sindicatonan. Pero den Aruba su capacidad pa traha hunto, defini condicionnan y construi institucionnan fuerte.

Autonomia di berdad no ta bin for di rechazo automatico. Autonomia ta bin ora nos ta capabel di acepta instrumento, defini condicionnan y haci esaki sirbi nos propio futuro.

Kico awor?

Si Parti 3 a mustra cu autonomia no ta solamente un asunto individual, pero tambe colectivo—den sindicato, na trabou, den sociedad—e pregunta ta bira mas incomodo: Kico nos ta acepta hunto, sin niun hende no ta para pa husticia?

Parlamento ta representa interes di pueblo di berdad,of ela a bira djis un formalidad?

Parlamento y gobierno ta haci nan trabou di control y goberna bon, of ta un obra teatral unda nan ta bringa braza y pueblo ta laga nan tumabo y nos tur haci?

Paso e berdad ta simpel, pero duro:

Autonomia colectivo no ta muri den un dia. E ta desaparece ora participacion no tey mas.

Y participacion no ta un palabra grandi. E ta ora hende ta:

• papia.
• puntra.
• pidi claridad.
• no acepta “asina e ta” como final.

Pero esey ta incomodo. Paso e ta kibra cu e trankilidad di no “mete.” Pero sin participacion, e sistema ta sigui cu ordo di dia, pero no cu bo interes na pecho.

Ora bo ta sinti cu bo no kier bisa nada, bo no kier vota, bo no kier nada di haci cu politica of niun instituto—pasobra “nada no ta cambia toch?” Esey ta kico nan kier pa bo haci—pa entrega bo poder.

Paso ora nos keda keto, nos ta duna otro hende espacio pa dicidi pa nos. No pasobra nan tin mas poder. Pero pasobra nos no ta uza esun di nos.

E yabi di bo poder ta den bo man. Con bo ta posiciona bo mes ta haci e diferencia.

E ta den man di cada persona, y tambe grupo di persona manera sindicato, asociacion, gremio, etc. Un persona pero e colectivo por scoge pa papia…of keda keto.

Nan no kier pa bo wak, cu nos ta bira mas fuerte ora nos no tin miedo mas pa papia.

Eynan tur cos ta cuminsa. P’esey mi a diseña Yabinan di Poder – Parti 1: Asumi bo posicion.

No pa filosofia, sino pa bo por:

wak ken kier tumabo haci, dal nan un break mesora, y asumi bo posicion cu claridad.

No permiti e sistema tratabo manera un number.

Si abo kier move y asumi bo posicion den bo bida—

aki ta unda pa cuminsa.

Jayburtt J. Dijkhoff, PhD

Experto den derechonan di Salud, calidad di cuido y reflexion social

Bo kier sa mas? Join mi curso e Yabinan di poder aki: