E olifanti no ta ros, e ta blanco: fusion hospitalnan Aruba?

Un pashent na San Nicolas ta spierta cu dolor.

No ta algo dramatico. Pero suficiente pa preocupa.

E ta bay na un clinica cerca. Nan ta haci examen. Nan ta duna e siguridad cu e ta busca.

Pero, despues nan ta manda e pashent bay Hospital. Esaki kiermen un dokter nobo, un Intake nobo. Y eynan e ta scucha e frase cu hopi Arubiano ta reconoce:

"Mester haci e examen atrobe aki."

No pasobra e prome examen tabata malo. Pero pasobra e sistema no ta reconoce su mes.

Esaki — e momento chikito, frustrante, innecesario — ta e corazon di tur e debate aki. No den post di LinkedIn. No den metafora di olifanti roos of burico. Pero den e bida real di hende cu ta move den un sistema cu no ta alinea.

Legalmente, "hospital" no ta existi

Na Aruba, nos por haci un pregunta simpel: nos tin un hospital of dos?

Pero legalmente, e pregunta aki no ta sisti.

No tin ningun definicion oficial di loke ta un "hospital" — ni den Landsverordening AZV, ni den Landsverordening kwaliteit in de gezondheidszorg, ni den Burgerlijk Wetboek.

Loke nos ta yama "hospital" no ta un categoria legal. Ta un rol den un sistema.

Esaki ta cambia henter e storia y debate publico. Pasobra si no tin definicion fiho, nos no ta discutiendo cu hechonan. Nos ta debatiendo escogencianan con e sistema a wordo diseña.

E sistema a diseña su mes pa limita loke awo ta critica

Tin un punto den e debate aki cu a keda implicito mucho largo. Ta ora pa yam’e na su nomber.

Ora gobierno di Aruba a duna Stichting Onroerend Goed Aruba (SOGA) e derechonan di propiedad riba e tereno unda Hospital Horacio Oduber ta ubica, y a contrata SOGA pa construi y maneha e edifcionan nobo y bieu, SOGA a asegura algo notable a cambio: un clausula fuerte cu ta prohibi gobierno di permiti pa establece otro hospital riba e isla durante e duracion di e contract. Si gobierno viola esaki, SOGA tin derecho pa demanda gobierno di Aruba pa miyones di florin na daño.

Laga esaki “sink in”.

Un fundacion priva, cu contract pa construi un hospital subsidia pa gobierno, a obtene e derecho legal pa preveni Aruba di desaroya un segundo hospital — bou di menasa di penalidad financiero pa pais Aruba mes.

Esaki no ta un ambiente neutral di politica. Ta un limitacion structural, disfrasa como un clausula di sostenibilidad.

Y awo — contra e mesun construccion aki — e CEO di e mesun hospital ta bisanos cu ImSan no ta un hospital real pasobra nunca ela desaroya e capacidad completo di ta hospital.

E problema no ta subtil. E ta un logica absurdo.

Bo no por pasa añanan manteniendo un barera contractual contra desaroyo di otro hospital, y despues presenta e resultado di e limitacion ey como evidencia cu e no por cumpli. Esaki no ta analisis drechi, sino un argumento circular pa yega na un conclusion predetermina cu ta casi cruza e liña di manipulacion di e argumentonan presenta.

Fragmentacion, e base pa fusion hospitalnan Aruba?

Nos ta wordo bisa cu e problema ta "fragmentacion." Pero unda e data a keda? Kico e pashentnan ta experiencia den realidad?

Nan ta bay na un laboratorio priva of clinica pa haci examen — algun biaha un MRI cu nan a paga for di nan mesun saco, pasobra nan no por warda mas. Nan ta yega Hospital cu e resultado den man. Y nan ta wordo bisa: no por acepta esakinan. Haci'e atrobe aki.

Y aki ta unda e fast ball kier wordo pasa. E problema no ta un fusion di e hospitalnan di Aruba. E problema ta cu no tin coordinacion cu ta garantisa calidad y siguridad structuralmente. Y e coordinacion aki no ta rekeri ningun clase di fusion.

Mas importante ainda: den un sistema financia henteramente door di AZV, unda no tin mercado habri ni competencia priva, un hospital cu ta rechasa examennan haci pafor di su portanan, clinicamente, no ta hustificabel. Ta un abuzo di poder institucional a costo di e pashent.

Acceso ta un derecho, no un luho

Pa un pashent na San Nicolas, acceso no ta algo teoretico. Nos ta papia di distancia, di tempo pa yega aya — di e escogencia si e ta bay of e ta warda.

Un sistema di cuido mester wordo diseña rond di realidad ey. No como un pensamento tuma den un oficina grandi y comodo, den un toren blanco, pero como un principio basa den ley. Pashentnan tin derecho riba acceso na cuido cerca di cas.

Dos bron ta manda aki: Articulo V.23 di Staatsregeling van Aruba y Articulo 12 di e Tratado Internacional di Derechonan Economico, Social y Cultural.

Kiermen no ta cuestion di kier, si no cuestion di derecho riba bida di hende. Varios hospital no automaticamente kiermen: b’a wak, ineficiencia!

No, e kiermen pa Buchi, pa Maria, pa tur hende eyfo cu nomber y famia, cu tin igualdad pa por yega na cuido di salud den bida real, no djis den cifras.

Loke pueblo ta bisa berdaderamente

E reaccionnan riba e proposicion pa basicamente “laga HOH guli ImSan” bou capa di eficiencia di un solo hospital, a para bira un debate masha fuerte. Pero e no ta irracional.

Pueblo no ta rechazando un bon coordinacion. E ta rechazando e perdida di algo cu te ainda ta traha pa nan: ImSan.

E ta resistiendo e duda feros den e fusion di e 2 hospitalnan na Aruba, tanten cu no tin e debido confiansa.

Y ora un debate di cuido di salud cuminsa wordo expresa den terminonan di identidad, cultura y unda nos ta pertenece, esaki ta un señal cla cu pueblo no ta mira e sistema como algo neutral mas. Nos no por cera wowo y ignora e hecho aki.

Kico anto? E situacion ta rekeri pa duna pueblo bek: claridad structura, gobernansa husto y coordinacion cu e hende na centro.

Loke mester pasa awo

Prome cu cualkier fusion structural wordo considera, tres cos mester bira cla:

Prome: Mester trece transparencia completo riba e areglonan contractual y financiero — inclusive e areglo di SOGA — cu a forma loke nos sistema ta awe. Pueblo tin derecho di compronde e condicionnan bou di cual nan cuido a wordo diseña.

Di dos: Data publico riba diagnostico, referencia, tempo di espera y resultado di pashent — na ambos institucion. Nos no kier asumi. Nos no kier mas post di LinkedIn. Pueblo merece wak data.

Di tres: Un modelo concreto di coordinacion — un dossier electronico comparti, protocolonan comun, camindanan di referencia cla — implementa y evalua, sin fusion. Si coordinacion no por wordo logra den e structura actual, e fayo mester wordo demostra transparentemente.

Solamente asina, cambio structural por wordo considera cu legitimidad.

Pero un cos si! Mi no ta bisa cu e sistema ta bon. E no ta bon. Mi no ta bisa cu ImSan ta mucho bon pa haya critica. Ningun instituto ta asina. Y mi no ta bisa cu integracion nunca lo ta necesario.

Loke mi ta bisa ta esaki: bo no por rediseña un sistema cu ainda niun hende no a describi honestamente.

Bo no por absorba un institucion a base di limitacionnan cu bo mes a yuda crea.

Y bo no por construi confiansa door di bypass e hende — e pashentnan, e trahadornan, e parlamento — cu e decision aki, cu lo afecta tur nan bida.

Aruba ta suficientemente chikito pa cada decision malo pa cu e sistema impacta tur hende. Y suficientemente fuerte pa, si nos diseña esey honestamente, construi algo cu berdaderamente ta traha.

Esaki ta e combersacion cu ta bale la pena tene. No un olifanti ros. No buriconan. Pero hende cu ta cuida pa otro, den cuido medico y mas aya.

Jayburtt Dijkhoff, PhD Experto den derechonan di salud, calidad di cuido y reflexion social, Autor di 'E Derechonan di Pashent'

Si bo a yega di pasa den un situacion cu nan kier tumabo haci: no contestabo, bo email of bo carta, bo no ta usando bo poder. Yabinan di Poder 1: asumi bo posicion — lo cuminsa pronto. Sigui e combersacion.